Социальнай үлэһиттэргэ эбии төлөбүр оҥорууга 40 мөл.солк. көрүлүннэ

Россия бэрэсидьиэнэ Владимир Путин соругунан өрөспүүбүлүкэ судаарыстыбаннай уонна муниципальнай социальнай тэрилтэлэрин үлэһиттэригэр эбии төлөбүрү оҥорууга федеральнай бүддьүөттэн 40-тан тахса мөлүйүөн солкуобай көрүлүннэ. Бу туһунан СӨ үлэҕэ уонна социальнай көмүскэллээх буолууга министиэристибэтин пресс-сулууспата иһитиннэрэр.

«Бу күннэргэ Саха сирин бары социальнай өҥөнү оҥорор судаарыстыбаннай уонна муниципальнай тэрилтэлэрин үлэһиттэрэ муус устар уонна ыам ыйдааҕы федеральнай хааһынаттан көрүллэр эбии төлөбүрдэрин тутуохтара», – диэн этиллэр.

Ол курдук, стационарнай тэрилтэлэргэ быһаччы үрдүттэн олорон үлэлиир быраастарга көрүллэр эбии төлөбүр кээмэйэ икки нэдиэлэлээх симиэнэҕэ 40 тыһыынча солкуобайга тэҥнэһэр. Коронавирустаах ыарыһаҕы кытта үлэлэһии түгэнэ таҕыстаҕына, бу төлөбүр кээмэйэ 60 тыһыынча солкуобайга тэҥнэһэр.

Орто медицинскэй персоналга, социальнай уонна педагогическэй үлэһиттэргэ, социальнай эйгэ психологтарыгар, салалта исписэлиистэригэр эбии төлөбүр кээмэйэ икки нэдиэлэлээх симиэнэҕэ — 25 тыһыынча солкуобай, коронавирустаах дьону кытта үлэлэһиигэ – 35 тыһыынча солкуобай.

Алын медицинскэй персоналга (сиэстирэ-хаһаайкаларга, санитаркаларга, сиделкаларга) – 15 уонна 20 тыһыынча солкуобай. Техническэй үлэһиттэргэ уонна онтон атын исписэлиистэргэ – 10 уонна 15 тыһыынча солкуобай.

Бу төлөбүр муус устар 15 күнүттэн — от ыйын 15 күнүгэр диэри изоляция эрэһииминэн үлэлиир кэмҥэ көрүллэрэ бэлиэтэнэр.

Федеральнай эбии төлөбүртэн ураты өрөспүүбүлүкэттэн көрүллэр төлөбүр эмиэ бэриллэн саҕаламмыта этиллэр. Муус устар 1 күнүттэр ылата үлэлээбит дьоҥҥо эбии көмө көрүүгэ өрөспүүбүлүкэ бүддьүөтүттэн уопсайа 21 мөлүйүөн солкуобай ыытылынна.

Бүгүҥҥү күҥҥэ Саха сириргэр изоляция эрэһииминэр 38 социальнай хайысхалаах судаарыстыбаннай уонна муниципальнай тэрилтэ үлэлиир,баларга үс тыһыынчаттан тахса киһи олорор уонна биир симиэнэҕэ 800 кэриҥэ үлэһит үлэлиир.