Социальнай тэрилтэлэр үлэһиттэригэр эбии төлөбүр көрүллэр буолла

Россия бэрэсидьиэнэ Владимир Путин этиитинэн олохтоммут, коронавируһу утары охсуһар медицинскэй үлэһиттэргэ көрүллэр эбии төлөбүрү өрөспүүбүлүкэ социальнай хайысхалаах анал тэрилтэлэрин 800 үлэһитэ ылыаҕа. Тустаах ыйааҕы Ил Дархан Айсен Николаев ыам ыйын 21 күнүгэр баттаата.

Социальнай хайысхалаах стационарнай тэрилтэлэргэ быһаччы үрдүттэн олорон үлэлииллэр быраастар икки нэдиэлэтээҕи симиэнэ иһин ылар эбии төлөбүрдэрин кээмэйэ 40 тыһыынча солкуобайга тэҥнэһэр. Коронавируһунан ыалдьыы түбэлтэтэ таҕыстаҕына уонна быраас коронавирусттаабыт дьону кытта үлэлэһэр түбэлтэтигэр эбии төлөбүр кээмэйэ 60 тыһыынча солкуобайга тэҥнэһиэҕэ.

Орто медицинскэй персонал: социальнай үлэһиттэр, иитээччилэр, психологтар, администиративнай салалта исписэлиистэрэ икки нэдиэлэтээҕи симиэнэ иһин ылар төлөбүрдэрэ 25 тыһыынча солкуобайга тэҥнэһэр, коронавирустаабыт дьону кытта үлэлэһэр түбэлтэлэригэр – 35 тыһыынча солкуобай.

Алын медицинскэй персонал: сиэстирэ-хаһаайкалар, санитардар ылар эбии төлөбүрдэрин кээмэйэ 15 уонна 20 тыһыынча солкуобайга тэҥнэһэр. Техническэй исписэлиистэр уонна атын дуоһунастаах үлэһиттэр – 10 уонна 15 тыһыынча солкуобай.

Үлэлиир симиэнэ болдьоҕо 14 күнтэн өр бириэмэ салҕанар түгэнигэр, 14 күҥҥэ көрүллэр эбии төлөбүр толору бэриллэр, атын күннэрэ чахчы үлэлээбит күннэринэн төлөнөр.

Бу миэрэ үс ый устата, муус устар 15 күнүттэн — от ыйын 15 күнүгэр диэри көрүллэрэ бэлиэтэнэр.