Совбез бэрэссэдээтэлин солбуйааччытын дуоһунаһын туһунан сокуон барыла Госдума I ааҕыытын ааста

Тохсунньу 21 күнүгэр дойду бэрэсидьиэнэ Россия куттал суох буолуутугар Сэбиэтин бэрэссэдээтэлин солбуйааччытын дуоһунаһын олохтуур туһунан этиитин Госдума маҥнайгы ааҕыыга өйөөтө. Бу туһунан ТАСС иһитиннэрэр.

«Сокуон барыла Россия куттал суох буолуутугар Сэбиэтин олохтоох чилиэнин кэккэтигэр киирсэр, бэрэссэдээтэл солбуйааччытын дуоһунаһын олохтооһуну сабаҕалыыр, ону тэҥэ бу дуоһунаһы анааһын уонна уһулуу бэрээдэгин быһаарар», — диэн докумуоҥҥа этиллэр.

Саҥа сокуон барылынан Совбез бэрэссэдээтэлин солбуйааччытын дуоһунаһыгар анааһыын уонна уһулуу судаарыстыба баһылыгынан ыытыллыаҕа. Боломуочуйатын эмиэ бэрэсидьиэн быһаарыаҕа. Саҥа дуоһунаска атын тас дойдуга гражданствота суох Россия гражданина ананыаҕын сөп.

Россия куттал суох буолуутугар Сэбиэтин бэрэссэдээтэлин солбуйааччытын дуоһунаһа Владимир Путин ыйааҕынан бу дьыл тохсунньу 16 күнүгэр олохтоммута. Бу дуоһунаска дойду урукку премьер-миниистирэ Дмитрий Медведев ананна. Дойду баһылыгын ыйааҕар Россия «Куттал суох буолуутун туһунан» сокуонугар тустаах уларыйыы киириэхтээҕэ этиллэр.