Спортивнай тэрилтэлэр үлэлиир ирдэбиллэрэ оҥоһулунна

Олохтоммут эпидемиологическай балаһыанньанан сибээстээн өрөспүүбүлүкэ спортка министиэристибэтэ спортивнай тэрилтэлэр үлэлиир ирдэбиллэрин бэлэмнээтэ. Бу туһунан министиэристибэ пресс-сулууспата иһитиннэрэр.

«Коронавирус инфекцията күүскэ тарҕаныытын сэрэтэр сыалтан Роспотребнадзор өрөспүүбүлүкэтээҕи салаатын кытта спортивнай эбийиэктэр үлэлэрин биир кэлим халыыба оҥоһулунна», — диэн СӨ спортка миниистирин э.т. Александр Бугаев эттэ.

Саҥа ирдэбил дьарыктанар дьон ахсаанын чопчу регламенын биэрэрэ этиллэр.

Тренажернай уонна фитнес саалаларга биир дьарыктанар киһиэхэ түөрт квадратнай миэтэрэ иэннээх сир көрүллүөхтээх, бассейнарга — биэс квадратнай миэтэрэ иэннээх уу эркинэ. Таҥас уларыттар сирдэргэ социальнай арыт булгуччу тутуһуллуохтаах.

«Спортивнай эбийиэк иһигэр сылдьааччылар дьарыктанар кэмнэриттэн ураты, булгуччу мааскалаах уонна бэрчээккэлээх буолаллара, 1,5 миэтэрэ социальнай арыты тутуһаллара, ону тэҥэ терапевт быраастан дьарыктаныахтарын сөбүн туһунан ыспыраапка тиксэрэллэрэ ирдэнэр. COVID-19 вирус суоҕун туһунан эбии ыспыраапка ирдэммэт», — диэн Александр Бугаев бэлиэтээтэ.

Спортивнай эбийиэккэ киирэн дьарыктанар дьор бөлөҕүн икки ардыгар санитарнай ыраастааһыҥҥа, саалалары, таҥас уларыттар сирдэри уонна да атын уопсастыбаннай миэстэлэри салгылатарга анал тохтобул баар буолуохтаах.

Ону тэҥэ коронавирус инфекцията тарҕаныытын сэрэтэр сыалтан цифровой пропуск систиэмэтэ үлэлээтэ. Пропуск онотторорго propusk.sakha.gov.ru/auth портал нөҥүө региастрация ааһы эбэтэр AppStore уонна PlayМаркет нөҥүө «Саха сирин цифровой пропуска» («Цифровой пропуск Якутии») сыһыарыыны хачайдаан ылыы ирдэнэр.