Сунтаар библиотеката «Сунтаар — Олоҥхо дойдута» куукула испэктээкилин уһулла

Сунтаардааҕы кииннэммит библиотека ситимин оҕо салаата баайыы куукулаларынан «Сунтаар — Олоҥхо дойдута» видео-испэктээкили уһулла.

Оҕо салаатын библиограба Светлана Иванова «Куукула+кинигэ» куукула тыйаатырын үлэлэтэр. Баайыы куукулаларынан уопсайа сэттэ видео-ролик уһуллубут уонна 40-тан тахса испэктээкил туруоруллубут.

«Куукулалары баайыынан бэйэм уруккуттан сөбүлээн дьарыктанабын. 18-с сылын библиотека иһинэн куукула тыйаатырын тэрийэн үлэлэтэбин. Маннык дьарык оҕолору кинигэ ааҕыыны таптыырга үөрэтэр», — диэн Светлана Иванова кэпсээтэ.

Испэктээкиллэр бары нуучча, саха уонна тас дойду остуоруйаларыгар олоҕуран туруоруллубуттар. Хас биирдии сыаната кинигэ уруһуйун хатылыыр. Бары үлэлэр библиотека тэрээһиннэригэр куруук туһаныллаллар.