Сунтаар улууһугар бөрө ахсаана элбээбитэ бэлиэтэнэр

Адьырҕа кыыл элбээн тыа хаһаайыстыбатын салаатыгар хоромньуну таһаарар.  Дьон сүөһүлэрин-сылгыларын бөрөлөр тарданнар, бултаһарга туруннулар. Сунтаар улууһугар ааспыт сылга 25 адьырҕаны бултаабыттара.

«Бу кыстыкка киирэн баран бөрөлөр 13 сылгыны тардыбыттара биллэр — уона Кириэстээх нэһилиэгэр, үһэ Хадаҥ нэһилиэгэр», — диэн Улуустааҕы тыа хаһаайыстыбатын салаатын салайааччытын солбуйааччы Прокопий Никитин кэпсээтэ.

Өрөспүүбүлүкэ уонна улуус үбүлээһининэн биир бөрө тириитин сыаната 40 тыһыынчаҕа тэҥнэһэр. Быйылгы улууска тоҕус биригээдэ тэриллэн үлэлиир. Биригээдэлэр тиэхиньикэнэн бултуур буоланнар, сүрүн кыһалҕаларынан уматыгынан хааччыллыы буолар.

«2013, 2014 уонна бу быйыл 2019 сылга тыабыт умайан, арыыланан хаалбыт сиргэ кыыл таба уонна тайах муһунна. Бултарын батыһан бөрөлөр эмиэ кэллилэр», — диэн айылҕа харыстабылын инспиэктэрэ Николай Герасимов иһитиннэрдэ.

Кэмпэндээйи сэлиэнньэтин сылгы баазатыттан балтараа килэмиэтир тэйиччи сытар сиртэн икки бөрөнү бултаатылар. Аны саас манна бизонарий тэриллиэхтээх. Онон сылгыга эрэ буолбакка, саҥа хаһаайыстыбаҕа куттал суох буоларыгар үлэлииллэр.