Сунтаарга балтараа суукка муна сылдьыбыт киһини буллулар

Кыыдааннаах кыһын сатыылаан турдаҕына, аһаҕас халлаан анныгар балтараа суукка устата муна сылдьыбыт киһини буллулар.

Сунтаар Хаданыгар муна сылдьыбыт Виссарион Спиров санаата бөҕөх уонна эт-хаан өттүнэн эрчиллиилээх буолан быыһанна. Кыһыҥҥы тымныыга тоҥуу хаарга хараҥаны сырдатар фонарига да, испиискэтэ да суох сүүрэр-хаамар икки ардынан муна-тэнэ сырытта.

Дьиҥэ мунааҕа суох, айылҕаҕа сылдьа үөрүйэх Хадан олохтооҕо күнүс 11 чааска сылгыларын көрдүү барбыт. Халлаан хараҥарбытын билбэккэ хаалан суолун сүтэрэн, бөһүөлэктэн 12 килэмитир тэйиччи сытар сиргэ тиийэ сылдьыбыт. Муммут киһи биир кэм эргийэ сылдьан төһө уһуну хаампыта биллибэт.

«Киһи уолуйуон, эбэтэр таҥнары да баран хаалыан сөп эбит. Ханан киирбиккин, ханан тахсыахтааххын отой умнубакка төбөҕөр хатаан кэбиһиэххин наада», — диэн Виссарион Спиров кэпсиир.

Киэһээ 6.00 чааска бииргэ төрөөбүт балта аймалҕаны таһааран, сарсыарда халаан сырдыыта сэттэ киһи икки бураанынан көрдүү барбыт. Көрдөөччүлэр Виссарион суолун булаат кэнниттэн батыспыттар.

«Ол түүн таһырдьа -30 кыраадыс тымныы эбит. Хата баата истээх испиэс таҥастаах уонна бэйэтэ спордунан дьарыктанар, эт-хаан өттүнэн кыанар буолан быыһанна», — диэн быыһааччылар бэлиэтииллэр.

Билигин муна сылдьыбыт киһи туруга чэгиэн. Айылҕам араҥаччылаан тыыннаах хааллым диир дьоруойбут.