Сунтаарга уот ситимин чөлүгэр түһэрэр үлэ салҕанар

НВК САХА — Балаҕан ыйын 19 күнүгэр күүстээх тыал уонна инчэҕэй хаар түспүтүн түмүгэр уота суох хаалбыт Сунтаар улууһун Сунтаар, Сардаҥа, Кириэстээх, Наахара, Хордоҕой уонна Илимниир бөһүөлэктэригэр уот хааччыйыыта чөлүгэр түстэ. Бу туһунан «Якутскэнерго» ПАУо пресс-сулууспата иһитинэрэр.

«Балаҕан ыйын 20 күнүгэр 11.00 чаастааҕы туругунан Туойдаах, Агдары, Төҥкө, Куокуну, Аллыҥҥа, Маар-Күөл, Арыылаах, Уһун-Күөл бөһүөлэктэригэр саахал тахсыбыт содулун туоратар үлэ салҕанар», — диэн этиллэр.

Саахалы туоратар үлэҕэ Сунтаардааҕы РЭС 21 исписэлииһэ уонна 6 тиэхиньикэ кытта сылдьар. Көмөҕө Ньурбатааҕы РЭС 6 үлэһитэ уонна 2 тиэхиньикэ кэлэн үлэлии сылдьаллар.