Суол саахалларыгар үс сатыы киһи эчэйбит

НВК САХА — Ааспыт сууккаҕа өрөспүүбүлүкэҕэ үс суол саахала тахсыбыт. Бу туһунан Суолга куттал суох буолуутун судаарыстыбаннай инспекцията тириэрдэр.

Балаҕан ыйын 11 күнүгэр күнүс 13.00 чаас саҕана Дзержинскэй уонна Строителей уулуссалар быһа охсуһууларыгар «Тойота Виш» массыына суоппара Дзержинскэй уулуссатынан айаннаан иһэн, «Тойота Краун» массыынаҕа суолу биэрбэтэх. «Тойота Краун» массыына суоппара харсыһыыттан туораан биэрээри, тротуарга тахсан светофор остуолбатыгар саайыллыбыт.

«Саахалга суолу туораары тротуарга кэтэһэн турбут 2002 сыллаах төрүөх сокуоннай сааһын туола илик кыыс эчэйбит », — диэн иһитиннэрэллэр. Эмсэҕэлээччи уҥа сототун өлөрбүт, балыыһаҕа таһыттан эмтэниини анаабыттар. Суоппардарга административнай боротокуол оҥоһуллубут.

Иккис саахал 15.20 чааска буолбут. «Тойота Лэнд Крузер» массыына суоппара Сэргэлээх суолунан айаннаан иһэн, 2000 сыллаах төрүөх суолу сатыы туораан испит киһини түҥнэри көппүт. Сатыы киһи мэйиитин доргуппут, сирэйин дьукку түспүт уонна хаҥас сототун өлөрбүт, балыыһаҕа таһыттан эмтэниини анаабыттар.

Өссө биир сатыы киһини түҥнэри көтүү 16.00 чааска Лермонтов уонна Свердлов уулуссалар быһа охсуһууларыгар тахсыбыт. «Тойота Виш» массыына суоппара Свердлов уулусатынан айаннаан иһэн уҥа салайаары 1948 сыллаах төрүөх суолу сатыы туораан испит саастаах киһини быһа охсубут. Эмээхсини суһал көмө пуунугар уҥа атаҕын тарбаҕа тостуулаах тиксэрбиттэр.

Саахаллар тахсыыларынан административнай силиэстийэ тэрилиннэ.