Суол сулууспатын инспиэктэрин түҥнэри көппүт суоппар суут иннигэр эппиэттиэҕэ

Өлүөнэ өрүһү көҥүлэ суох туоруур муус суолга суол сулууспатын инспиэктэрин түҥнэри көппүт суоппар холуобунай дыалата суукка бэрилиннэ. Бу туһунан СӨ борокуратууратын пресс-сулууспата иһитиннэрэр.

2019 сыл алтынньытыгар Toyota Wish массыына суоппара Өлүөнэ өрүһү туоруур муус суолга бобууну кэһэн туран тахсыбыта бэлиэтэнэр.

«Муус суолга киириигэ утары тахсыбыт Мэҥэ Хаҥаластааҕы суолга куттал суох буолуутун судаарыстыбаннай инспекцията үлэһитин көрөн баран, сокуонунан ирдэнэр тохтуурун туһунан ирдэбили тутуспакка, полиция үлэһитин массыынанан таарыйан суулларбыт», —диэн этиллэр.

Эр киһи биэс сылга диэри болдьоххо көҥүлэ быһыллыан сөп.