Суотабай сибээс быстыыта «ТрансТелеКом» ситимин саахалынан сибээстээх

Суотабай оператордар өҥөлөрүгэр тахсыбыт хааччахтааһын «ТрансТелеКом» АУо магистральнай ситимигэр тахсыбыт саахалынан сибээстээх. Бу туһунан СӨ инновацияҕа министиэристибэтэ иһитиннэрэр.

«Алдьаныыны булар уонна сыаналыыр аварийнай биригээдэ ыытылынна. Саахалы туоратар кэм эбии биллэриллиэҕэ. Суотабай оператордар сибээс резервнэй ханаалларыгар көһөр дьаһаллары ыыталлар», — диэн министиэристибэ тириэрдэр.

МТС хампаанньа суотабай оператор ситимигэр алдьаныы тахсыбатаҕын иһитиннэрдэ.

«МТС суотабай оператор ситимигэр алдьаныы суох, сибээс үлэтигэр тахсыбыт хааччахтааһыннар куортамнаммыт ханаал үлэтин кытта сибээстээхтэр», — диэн хампаанньа бэрэстэбиитэлэ эттэ.