Суруйааччы Дмитрий Глуховскай Дьокуускайга кэллэ

Бүгүн, муус устар 8 күнүгэр, Россия биллиилээх суруйааччыта, 2021 сылга ыытыллар «Тотальнай дьыктаан» тиэкиһин ааптара Дмитрий Глуховскай өрөспүүбүлүкэ киин куоратыгар кэллэ. Бу туһунан куорат дьаһалтатын пресс-сулууспата иһитиннэрэр.

Киэһэ 18:00 чаастан уопсастыбаннай киин саалатыгар ааҕааччылары кытта көрсүһүү буолуоҕа, киирии босхо. 455-855 нүөмэринэн көрсүһүүгэ сурутуу ыытыллар, миэстэ ахсаана хааччахтаах.

Муус устар 9 күнүгэр суруйааччы Арктика драматургтарын оскуолаларын кыттыылаахтарыгар анаан, «Точка кипения» былаһааккатыгар 17:00 чаастан маастар-кылаас ыытыаҕа.

Муус устар 10 күнүгэр, субуотаҕа, Дмитрий Глуховскай тиэкиһин «Тотальнай дьыктаан» аахсыйа чэрчитинэн, сүрүн былаһааккаҕа, Өксөкүлээх Өлөксөй аатынан норуоттар доҕордоһууларын дьиэтигэр ааҕыаҕа.

Дьыктаан 2021 сыллаахха Россия куораттарыттан Дьокуускайга буолара быһаарыллыбыта. Аан дойдутааҕы «Тотальнай дьыктаан-2021» аахсыйа өрөспүүбүлүкэ 150 былаһааккатыгар ыытыллыаҕа.

«Якутия 24» ханаал «Тотальнай дьыктаан-2021» аахсыйаны быһа көрдөрүөҕэ. Араас локациялартан быһа эпиир 13:30 чаастан саҕаланыаҕа уонна олохтоох бириэмэнэн 17:00 чааска диэри буолуоҕа.

Аахсыйа ыытылларынан өрөспүүбүлүкэ киин куоратыгар телебашня кыһыл өҥүнэн сандаарыаҕа.