Сыбаатай сэлиэнньэтигэр тыа баһаара тыалтан тэнийиэн сөп

Орто Халыма улууһун Сыбаатай сэлиэнньэтигэр тыа баһаарын балаһыанньата уларыйа турар. Бу туһунан өрөспүүбүлүкэтээҕи Куттала суох буолууну хааччыйар судаарыстыбаннай кэмитиэт пресс-сулууспата иһитиннэрэр.

Улуустааҕы суһал штаб иһитиннэрэринэн, билиҥҥи туругунан тыа баһаара нэһилиэнньэлээх пуунтан 1,5 килэмиэтир тэйиччи баар.

«Күнү-дьылы кэтээн көрөөччүлэр иһитиннэрэллэринэн, бүгүн хотугулуу-арҕааттан сөкүүндэҕэ 13-14 миэтэрэ түргэннээх тыал кэлэрэ сабаҕаланар», — диэн этиллэр.

Бэҕэһээ киэһэ арҕааттан күүстээх тыал үрэн баһаар минерализованнай балаһаны уҥуордаан арҕаалыы-илин көстө. Сөкүүндэҕэ 15 миэтэрэ түргэннээх тыалтан балаһыанньа ыараан, баһаар Алазея өрүс уҥуор таҕыста. Олохтоох бириэмэнэн киэһэ 19:00 чааска баһаар сэлиэнньэҕэ 500 миэтэрэ, дизель электростанциятыттан чугас, кэллэ.

Нэһилиэнньэлээх пууну харыстыыр сыалтан, минерализованнай балаһаны кыйа икки мотопомпалаах пластик турбаттан оҥоһуллубут уу кутар систиэмэ турда.

Киэһэ самыыр түһэн сорох баһаары умуруорда. Бүгүн Россия ыксаллаах быһыыга-майгыга министиэристибэтин өрөспүүбүлүкэтээҕи салаатыттан 20 киһи састааптаах аэромобильнай бөлөх Орто Халыма улууһун Өлөөкө-Күөл сэлиэнньэтиттэн Сыбаатайга тыа баһаарын умуруорууга кэллэ. Билиҥҥи туругунан, аһаҕас уот көстүбэт, бөлөх сир аннынааҕы көрдүгэни умуруорууга үлэлиир.