Төрүт сокуон көннөрүүлэрин талар куоластааһыҥҥа кыттыы сайаапкаларын тутуу саҕаланна

Кулун тутар 25 күнүттэн дойду Төрүт сокуонугар киирэр көннөрүүлэри талар куоластааһыҥҥа кыттыыга сайаапкалары тутуу саҕаланна. Бу туһунан «Парламентскай хаһыат» иһитиннэрэр.

Россия олохтоохторо олорор сирдэриттэн тутулуга суох ханнык баҕарар учаастакка куоластыахтарын сөбө бэлиэтэнэр. Талбыт быыбардыыр учаастактарыгар эрдэттэн сайаапка биэриллэрэ ирдэнэр. Сайаапкалары тутуу муус устар 16 күнүгэр диэри ыытыллыаҕа.

«2019 сылтан Россия федеральнай уонна региональнай таһымнаах быыбардарыгар «Мобильнай быыбардааччы» систиэмэ туһаныллар. Бу систиэмэ көмөтүнэн куоластааччылар олорор сирдэриттэн тутулуга суох, быыбар ыытыллар күнүгэр чахчы баар сирдэриттэн куоластыахтарын сөп», — диэн этиллэр.

Сайабылыанньалары «Госуслуги» портал, «Мин докумуоннарым» элбэх хайысхалаах киин, эбэтэр территориальнай быыбардыыр хамыыһыйа нөҥүө биэриэххэ сөп. Муус устар 11 күнүттэн учаскуобай быыбардыыр хамыыһыйалар «Мобильнай быыбардааччылар» сайабылыанньаларын тутан саҕалыахтара. Сайабылыанньа биэрэргэ пааспардаах тиийии ирдэнэр.

Киин быыбардыыр хамыыһыйа баһылыга Элла Памфилова дойду Төрүт сокуонугар киирэр көннөрүүлэри талар бүтүн Россиятааҕы куоластааһын муус устар 22 күнүгэр былааннанарын, бу күн дойду баһылыгын быһаарыытынан көһөрүллүөн сөбүн уонна билиҥҥи күҥҥэ оннук ыйаах тахса илигин туһунан иһитиннэрдэ.