Тааттаҕа өссө биир антисептик испит киһи өллө

Таатта улууһун Баайаҕа нэһилиэгэр антисептигы испит төрдүс киһи өллө. Бу туһунан Россия силиэстийэлиир кэмитиэтин өрөспүүбүлүкэтээҕи управлениетын пресс-сулууспата иһитиннэрэр.

«69 саастаах эр киһи тыына быһынна. Атыттар туруктара ыараханынан сыаналанар. Кинилэри санитарнай рейсинэн Дьокуускайга тириэрдии боппуруоһа быһаарыллар», — диэн силиэстийэлиир кэмитиэт өрөспүүбүлүкэтээҕи управлениетын салайааччытын үрдүкү көмөлөһөөччүтэ Надежда Дворецкая бэлиэтээтэ.

Силиэстийэ быһаарбытынан, 2020 сыл сэтинньи 18 күнүгэр Таатта улууһун Томтор сэлиэнньэтигэр тоҕус киһилээх хампаанньа чааһынай дьиэҕэ испиирдээх утаҕы испиттэр. Сарсыныгар 41 саастаах дьахтар дьиэтигэр тыына быстыбыт, 27 уонна 59 саастаах икки эр дьон балыыһа реанимациялыыр салаатыгар өлбүттэр.

28 уонна 32 саастаах икки эр дьон Таатта улуустааҕы киин балыыһатын реанимациялыыр салаатыгар комаҕа сыталлара этиллэр. Кинилэри санитарнай рейсинэн Дьокуускайга тириэрдиэхтээхтэр.

Өссө үс киһи балыыһаҕа медиктэр кэтээн көрүүлэригэр сытар. Кинилэр олохторугар куттал суоһаабат.

Сэрэҕэ суохтук быһыыланыыттан Таатта улууһугар түөрт киһи антисептиктан сүһүрэн өлүүтүн чахчытынан холуобунай дьыала тэрилиннэ.