Таатта сэттэ олохтооҕо тыыннара быстыытын дьыалатын силиэстийэлиир кэмитиэт хонтуруолга ылла

Таатта улууһугар антисептиктан сүһүрэн өлбүт сэттэ киһи дьыалатын РФ силиэстийэлиир кэмитиэтин Саха сиринээҕи салаата хонтуруолга ылла. Бу туһунан биэдэмистибэ пресс-сулууспата иһитиннэрэр.

«Эмсэҕэлээбит дьон аймахтарын доппуруостааһын кэнниттэн, антиисептигы олохтоох сэлиэнньэ маҕаһыыныттан атыыласпыттара билиннэ. Быһылаан тахсыбыт сириттэн этикиэккэтэ суох канистра ыллылар, чинчийии түмүгэр антисептик састаабыгар метанол баара билиннэ», — диэн иһитиннэриигэ этиллэр.

Санатан эттэххэ, тоҕус киһи испиирдээх суурадаһыны иһэн сүһүрбүтэ. Сэтинньи 21 күнүнээҕи туругунан, сэттэ киһи тыына быһынна.

Дьокуускай 2-с №-дээх өрөспүүбүлүкэтээҕи балыыһатыгар санитарнай авиациянан аҕалыллыбыт 48 саастаах дьахтар уонна 32 саастаах эр киһи ыарахан туруктаахтар.

Холуобунай дьыала хонтуруолланар уонна силиэстийэтэ салҕыы ыытыллар.