Табаҕа сэлиэнньэтигэр култуура дьиэтэ аһылынна

Кулун тутар 7 күнүгэр Табаҕа сэлиэнньэтигэр «Кедр» култуура дьиэтэ аһылынна. Бу туһунан Ил Дархан Айсен Николаев бэйэтин Instagram аккаунугар суруйда.

«Буолаары турар сааскы бырааһынньыкка Табаҕа олохтоохторугар уонна Дьокускай куорат уокуругар үөрүүлээх күн үүннэ — саҥа «Кедр» култуура дьиэтэ аанын тэлэччи арыйда. Табаҕа Туймаада хочотун биир кырдьаҕас сэлиэнньэтинэн буолар, кини баай историялаах уонна олус үчүгэй дьонноох», — диэн Айсен Николаев эттэ.

Култуур дьиэтигэр библиотека, айар үлэнэн дьарыктанар хос уонна культурнай тэрээһиннэргэ аналлаах дэгиттэр саала баар буолла.

Саҥа дьиэ иэнэ 1,3 тыһынча кыбадыраатынай миэтэрэҕэ тэҥнэһэр.