Таба иитэр ыстаадалар күһүҥҥү мэччийэр сирдэригэр таҕыстылар

НВК САХА – Хотугу дьиэ табаларын сайыҥҥы мэччирэҥэ этэҥҥэ түмүктэннэ.  Өрөспүүбүлүкэҕэ таба төбөтүн ахсаана 11 %-ан эбилибит, билиҥҥи туругунан 162 тыһыынча 794 табаҕа тэҥнэһэр.

Тыһы таба төрүөҕэ бүппүт, табаһыттар уопасайа 41 тыһыынча 114 тугуту ылбыттар. Бастыҥ көрдөрүүнү Анаабыр, Аллараа Халыма, Кэбээйи, Эдьигээн, Өлөөн уонна Усуйаана улуустарын хаһаайыстыбалара ситистилэр.

Хотугу улуустарга күһүҥҥү харааллааһын үлэтэ саҕаланна. Табалар туруктара үчүгэй, ыстаадалар күһүҥҥү мэччийэр сирдэригэр таҕыстылар. Табаһыттар оҕолоро туундараттан киин хаһаайыстыбаларга көһөрүлүннүлэр.

Күн бүгүн өрөс­пүүбүлүкэҕэ 106 таба иитэр хаһаайыстыба баарыгар, 1081 бостуук, 283 чуум үлэһитэ үлэлиир.