«Талбан» биэриигэ: «Мин докумуоннарым» киин өҥөлөрүн уонна дойду төрүт сокуонугар киирэр уларыйыылар тустарынан

«Мин докумуоннарым» элбэх өҥөнү оҥорор киин 2 %-наах ипотекаҕа докумуоннары тутан саҕалаата. Бу өҥө бары улуустарга оҥоһуллар дуо? Кэнники өссө ханнык саҥа өҥөлөр киирдилэр? Тыа сирин дьоно бу киин өҥөлөрүнэн төһө көхтөөхтүк туһанарый? Бу туһунан «Талбан» биэриигэ «Мин докумуоннарым» киин исписэлиистэрэ кэлэн сиһилии кэпсээтилэр.

Хамнас алын кээмэйин уонна социальнай төлөбүрдэр индексацияларын хайаан да дойду төрүт сокуонугар киллэрэр туһунан этиини дойду бэрэсидьиэнэ Владимир Путин оҥорбута. Бу суолтатын, төрүт сокуоҥҥа киирдэҕинэ туох уларыйарый? Туох көмүскэллээх буолуохпутуй? Бу туһунан сэһэргэһиигэ Саха сирин идэлээх сойуустарын Федерациятын бэрэссэдээтэлэ Николай Дегтярев кыттыыны ылла.

Ону тэҥэ Дьокуускайтан Алараа Бэстээхтээҕи тимир суол станциятыгар хайдах тиийиэххэ сөбүн уонна саха сирин үүнээйилэриттэн косметика оҥорор дьоҕус бизнестаах урбаанньыт Антонина Дормидонтова туһунан сиһилии «Талбан» биэриигэ көрүҥ.