«Талбан» биэриигэ: бэйдиэ ыт кыһалҕата быһаарыллыа дуо?

Тохсунньу 20 күнүгэр Ленскэй куоракка 15 бэйдиэ сылдьар ыт үөрэ аҕыс саастаах оҕоҕо саба түһүүлэрин түбэлтэтэ тахсыбытын бары истэ-билэ сылдьаҕыт.  Ыттар оҕо илиитин-атаҕын элбэх сирининэн ытырбыттар, төбөтүн уонна хараҕын тириитин хайа тардыбыттар.

Россия Силиэстийэлиир кэмитиэтин Саха сиринээҕи Силиэстийэлиир управлениета «Эбээһинэһи сөпкө толорбокко, сэрэҕэ суох дьайыыттан доруобуйаҕа ыарахан эчэйиини таһаарыы» ыстатыйанан холуобунай дьыала тэрийэн турар. Ыт кыһалҕата хаһан эрэ быһаарыаллыа дуо?

Оҕо санавиациянан Дьокуускайга кэлбитэ, эмчиттэр доруобуйатын туруга уустук диэн быһаараллар. Кини сокуоннай бэрэстэбиитэллэрэ комментарийтан туттуналлар. Оттон ааспыт күн Ленскэйгэ куорат дьоно мустан мунньахтаата.

Социальнай ситим оргуйан олорор,  дьон санаата хайдыста, бэйдиэ сылдьар ыттары аһынан, көмүскэһэр дьон аҕыйаҕа суохтар.

Киһи эппиэтинэһэ суоҕуттан, быраҕыллыбыт ыттартан эмсэҕэлээһин үлүгэрэ хаһан тохтуур? Питомник диэн биһиэхэ төһө сөптөөҕүй? Бу кыһалҕа хаһан эрэ быһаарыаллыа дуо? Бу туһунан «Талбан» биэриигэ кэпсэттилэр. СӨ ветеринарияҕа департаменын салайааччыта Василий Бураев, Дьокуускай куорат хаһаайыстыбатын хааччыйар тэрилтэ салайааччыта Айал Егинов, ыты иитээччи Айталина Поисеева, травматолог-быраас Игнат Семенов ыалдьыттаатылар.