«Талбан» биэриигэ: Булт лицензиятын ылыыга уларыйыылар тустарынан

Булт лицензиятын ылыыга уларыйыы киирдэ. Онно өскөтүн уоран бултуур, браконьердыыр киһини тыллаатаххына уонна кинини эн үҥсүүгүнэн миэрэҕэ тартахтарына, лицензияҕа тиксэҕин диэн этиллэр.

Бэҕэһээ өрөспүүбүлүкэ булчуттара бу уларыйыы хайыы үйэ үлэлии турарын билэн соһуйдулар да, айманнылар даҕаны. Тыллааһын, хобуоччулааһын иһин булчут барыта баҕарар лицензиятыгар тиксии төһө сиэрдээҕий диэн үгүс киһи муҥатыйда.

Атын дойдуларга сокуону кэһиини үҥсэн биэрии олохсуйбута ыраатта. Ол иһин бэрээдэк баар. Дьон бэйэ-бэйэтин манаһара кими да соһуппат.

Оттон биьиги дойдубут хобуоччулар кэмнэрин ыардык ааһан турар. ГУЛАГ дойдутугар кубулуйбутун ама умуннубут дуо? Бу «Булт туһунан» сокуоҥҥа киирбит уларыйыы, ол иһин да буолуо, булчуттары аймаата.

Эн хайыаҥ этэй: лицензия туһугар тыллыыгын дуу эбэтэр браконьердыыр дьону көрө-көрө көрбөтөҕө буолаҕын дуу?

Биэриигэ Николай Васильевич Додохов – СӨ экология, айылҕаны туһаныы уонна ойуур хаһаайыстыбатын миниистирин солбуйааччы кыттыыны ылла.