«Талбан» биэриигэ: саха киинэтэ «Оскар» ылыа дуо?

«Талбан» биэриигэ олимпийскай чемпион Роман Дмитриев уһуллубут кадра аан бастакыны телевидениеҕа таҕыста. Кини Эдьигээҥҥэ 1972 сыллаахха сырыытын киинэ оператора Василий Кустуктуров камераҕа устан хаалларбыт.

Ол курдук «Саха» НКИХ архыыбын үлэһиттэрэ 16 миллиметрдаах пленканы билигин «сыыппараҕа» көһөрөллөр.

Санатан эттэххэ, ааспыт сыл күһүнүгэр Василий Васильевич Кустуктуров дьиэ кэргэнэ аҕаларын архыыбыттан киинэ пленкалары Ил Дархаҥҥа туттарбыта. Саха сирин историятын, дьонун-сэргэтин үйэтиппит түһэриилэрэ билигин НВК «Саха» уонна киинэ хранилищетыгар сана формакка көһөрүллэллэр. 

Киинэ тематын таарыйдахха, быйылгы «Оскар» бириэмийэни туттарыы соһуччу түмүктээх буолла – англия тыллаах хартыына буолбакка, омук киинэтэ сүрүн «Оскары» ылла. Соҕуруу Корея режиссера Пон Чжун Хо «Паразиттар» диэн киинэтэ түөрт «Оскарга» тигистэ.

Бириэмийэни азиаттар киинэлэрэ ылбыта аан дойдуга элбэх кэпсэтиини таһаарда. Киинэ кириитигэ Антон Долин Америка киинэлэрэ биир баайыылаах буолан, конкуренциялара олус күүстээх буолла, ол иһин туораттан киинэ кыайара ордук диэн академиктар быһаарбыттар диэн тойонноото. Оттон сорохтор Голливуд улугурбут, мөлтөөбүт диэн эттилэр. Туох даҕаны диэбиттэрин иһин биһиэхэ, сахаларга, эрэл үөскээтэ.

Бу тула «Талбан» биэриигэ киинэ эйгэтигэр үлэлии сылдьар дьон кэпсэттилэр. «Сахафильм» хампаанньа салайааччыта Дмитрий Шадрин, режиссер Михаил Лукачевскай, режиссер Степан Бурнашев, блогер Николай Корякин ыалдьыттаатылар.