«Тэтим» радио саҥа сезоҥҥа тэтимнээхтик үлэлиэҕэ

НВК САХА – Балаҕан ыйыттан «Тэтим» радио саҥалыы тыыннанан үлэлиир. Элбэх сонун биэрии, бырайыак былааннанар. Бу туһунан «Саха» НКИХ радиотын дириэктэрэ Николай Бястинов уонна шеф-редактордар сиһилии суруналыыстарга кэпсээтилэр.

«Быйылгыттан саҕалаан сарсыардаттан киэһээҥҥэ диэри пультка ыытааччылар олороллор. Урукку курдук сарсыарда уонна күнүс автомат музыка суох буолар. Күн аайы миэстэттэн быһа холбонуу баар буолуоҕа. Тыын боппуруостары, истээччилэргэ интэриэһинэй тиэмэлэри ырытыахпыт. Буола турар быһыыны-майгыны тута тиэрдиэхпит. Маннык тиэмпэнэн үлэлээтэхпитинэ, биһиги араадьыйабыт саамай оперативнай, түргэн тэтимнээх буолуохтаах. Nvk-online.ru сайтка радиобыт биэриилэрин угуохпут. Иллэрээ сыл уонча кэпсээни подкаст курдук укпуппут, элбэх сэҥээриини ылбыта. Ютубка ханаалбытыгар эмиэ күүскэ үлэлиэхпит. Үгэс буолбут «Эрдэһиттэр», «Тыыннаах дорҕоон»,«Эр хоһуун», «Тайм аут», «Үрдэл», «Уус-уран ааҕыы», о.д.а. биэриилэр тахсалларын курдук тахсаллар. Ону таһынан саҥалар бааллар. Холобур, «Ырыа ыллыгынан» диэн саҥа биэриигэ аныгы ырыалары ырытыахпыт — тылын-өһүн, матыыбын. Олус интэриэһинэй сезон саҕаланна», — диэн кэпсиир Бястинов.

Ааспыт нэдиэлэҕэ «Тэтим» радио төлөпүөҥҥэ аналлаах босхо сыһыарыыта таҕыста. Нэдиэлэ устата хачайдаабыт дьон ахсаанынан Россия музыкальнай сыһыарыыларын чартыгар 208-тан 28-с миэстэҕэ таҕыста.

«Тас дойдуга олорор биир дойдулаахтарбыт бу сыһыарыы нөҥүө сахалыы радиоларын истэн, махталларын ватсабынан, төлөпүөнүнэн эрийэн биллэрэллэр. Биһиги радиобыт нөҥүө төрөөбүт дойдуларын кытары сибээһи туталлар», — диир Николай Бястинов.

Санатан эттэххэ, «Саха» НКИХ «Тэтим» радиотын FM 107.1 долгуҥҥа, төлөпүөҥҥэ сыһыарыыга, nvk-online.ru сайтка истиэххэ сөп.