Тохсунньу 11 күнэ — заповедниктар уонна национальнай пааркалар күннэрэ

Тохсунньу 11 күнүгэр 1997 сыллаахтан айылҕа харыстабылын киинин уонна аан дойдутааҕы айылҕа пуондатын көҕүлээһиннэринэн Россияҕа сыллата заповедниктар уонна национальнай пааркалар күннэрэ бэлиэтэнэр. Бу туһунан СӨ экологияҕа министиэристибэтин пресс-сулууспата иһитиннэрэр.

1917 сыл тохсунньу 11 күнүгэр Бурятияҕа бастакы Баргузинскай судаарыстыбаннай заповедник тэриллибит. Бүгүҥҥү күҥҥэ дойду үрдүнэн 100-тэн тахса заповедник уонна 35 национальнай паарка баар.

Саха сиригэр 234 араас хайысхалаах уонна таһымнаах айылҕа ураты харыстанар сирэ баар. Олор истэригэр сэттэ федеральнай таһымнаах, 128 региональнай уонна 99 олохтоох муниципальнай таһымнаах. Өрөспүүбүлүкэҕэ баар айылҕа ураты харыстанар сирдэрин уопсай иэннэриттэн региональнайдар уопсай иэннэрэ – 49,9 %-ҥа тэҥнэһэр, муниципальнайдар иэннэрэ– 41,4 %-ҥа, федеральнайдар иэннэрэ – 8,7 %-ҥа.

Кэлиҥҥи үс сылга дойду бэрэсидьиэнэ Владимир Путин көҕүлээһининэн олохтоммут «Экология» национальнай бырайыак чэрчитинэн Саха сиригэр түөрт саҥа айылҕа ураты харыстанар сирэ тэрилиннэ: Хаҥалас улууһугар «Өлүөнэ очуостара» («Ленские Столбы») национальнай паарка, Аллайыаха улууһугар «Кыталык» национальнай паарка, Аллараа Халыма улууһугар «Эһэлээх арыылар» («Медвежьи острова») судаарыстыбаннай заповедник уонна Булуҥ улууһугар «Новосибирскай арыылара» («Новосибирские острова») судаарыстыбаннай айылҕа заказнига.