Тохсунньу 18 күнүгэр Саха сиригэр 20 тыһыынчаттан тахса коронавирустан вакцина кэлиэҕэ

Тохсунньу 18 күнүгэр, бэнидиэнньиккэ, өрөспүүбүлүкэҕэ 22 тыһыынча доза коронавирустан вакцина кэлиэҕэ.

СӨ доруобуйа харыстабылын миниистирэ Елена Борисова Instagram нөҥүө быһа эппииргэ иһитиннэрбитинэн, билиҥҥи туругунан Саха сиригэр биэс тыһыынчаттан тахса доза кэлбитэ.

«2,2 тыһыынча дозалаах кэнники партия бэҕэһээ кэлбитэ. Билигин маркировкаланар уонна бээтинсэҕэ улуустарынан тарҕаныаҕа», — диэтэ кини.

Кини этэринэн, билиҥҥи туругунан, быһыыны 1,7 тыһыынча Саха сирин олохтооҕо ылла.

«Бэнидиэнньиккэ өссө эбии 22 тыһыынча вакцина кэлэрэ күүтүллэр. Онон маассабай быһыы саҕаламмытын туһунан этиэхпитин сөп», — диэн Елена Борисова бэлиэтээн эттэ.

Миниистир этэринэн, олохтоохтор быһыыны ханнык баҕар медицина тэрилтэтигэр ылыахтарын сөп. 18-гар диэри саастаах, хат уонна оҕо эмиийдэтэ сылдьар, аллергиялаах дьон ылбаттар.