Тохсунньу 22 күнүгэр 203-с микрооройуоҥҥа саҥа оскуола аһыллыаҕа

РФ бэрэсидьиэнэ Владимир Путин көҕүлээбит «Олорор дьиэ уонна куорат эйгэтэ» национальнай бырайыак чэрчитинэн, тохсунньу 22 күнүгэр 203-с микрооройуоҥҥа 360 миэстэлээх саҥа оскуола аһыллыаҕа. Бу туһунан СӨ тутуу министиэристибэтин пресс-сулууспата иһитиннэрэр.

Үс этээстээх эбийиэги тутуу 2019 сыл балаҕан ыйыттан саҕаламмыта. Икки сыл иһигэр биэс тыһыынча иэннээх сиргэ 19 630 квадратнай миэтэрэлээх эбийиэк тутулунна. «Кинг-95» тутуу тэрилтэтэ сайын устата үлэҕэ устудьуоннар этэрээттэрин байыастара кыттыыны ыллылар.

Үбүлээһин 396,5 мөлүйүөн солкуобайтан тахсар, ол иһигэр 252,84 мөлүйүөн — федеральнай сириэстибэ, оттон 143.6 мөлүйүөн — өрөспүүбүлүкэ гиэнэ.

СӨ Үөрэҕин уонна наукатын министиэристибэтин пресс-сулууспата иһитиннэринэн, саҥа оскуолаҕа үөрэх балаҕан ыйын 1 күнүттэн саҕаланыаҕа.

«Лицензия оҥоһулуннаҕына, 203 микрооройуоҥҥа олорор үөрэнээччилэр көһүөхтэрин, уонна үөрэх дьылын ортотуттан кылаастары таһааран барыахпытын сөп», диэн министиэристибэҕэ бэлиэтээтилэр.