Тохсунньу 30 күнүгэр Хаандыгаҕа саҥа библиотека аһыллыаҕа

Тохсунньу 30 күнүгэр Томпо улууһун Хаандыга бөһүөлэгэр икки мэндиэмэннээх саҥа таас библиотека дьиэтэ үөрүүлээх быһыыга аһыллыаҕа. Бу туһунан СӨ култуураҕа уонна духуобунай сайдыыга министиэристибэтин пресс-сулууспата иһитиннэрэр.

«Тутуу 2019 сылга «2018-2022 сыылларга уонна 2026 сылга диэри былааннанар кэмҥэ өрөспүүбүлүкэҕэ култуура эйгэтин сайыннарыы» судаарыстыбаннай бырагыраама иитинэн ыытылынна. Эбийиэк уопсай суумата 129,9 мөлүйүөн солкуобайга тэҥнэстэ. Библиотека саҥа дьиэтэ 1480 кв миэтэрэ иэннээх, икки мэндиэмэннээх, 1700 кв миэтэрэ сыста сытар сирдээх», — диэн министиэристибэ тириэрдэр.

Саҥа дьиэҕэ улуустааҕы киин библиотека салаалара, 25 миэстэлээх интернет-киин, абонементнай уонна ааҕар саалалар, оҕо библиотеката, 60 миэстэлээх аактабай саала уонна быыстапка саалата олохтонуохтара.

Инникитин манна Саха сирин иккис бэрэсидьиэнэ Вячеслав Штыровка ананар архыып-библиотека аһыллара уонна гражданскай турук аактатын суруйар управление салаата киирэрэ былааннанар.