«Тойон кыыл» киинэ Россия кэлиҥҥи уон сылын сүрүн киинэлэрин испииһэгэр киирдэ

ПрофиСинема интернет-портал саха режиссера Эдуард Новиков «Тойон кыыл» («Царь-птица») киинэтин Россия уон сылын сүрүн киинэлэрин испииһэгэр киллэрдэ.

«Саха режиссера Эдуард Новиков киинэтэ Москватааҕы норуоттар икки ардыларынааҕы киинэ бэстибээлин сүрүн бирииһин ылан, региональнай киинэ саҥа статуһун бигэргэттэ. Россия өрөспүүбүлүкэлэригэр уонна уобаластарыгар олохтоох энтузиастар устубут киинэлэрэ өр кэм устата биллибэт эттилэр, кинилэри кыараҕас эйгэ исписэлиистэр эрэ билэллэрэ. «Тойон кыыл» («Царь-птица») региональнай киинэ ситэн-хотон, дойду киинэ оҥорооччуларын толору чилиэнэ буолбутун дакаастаата», – диэн таһаарааччы редактор Алексей Беззубиков суруйар.

«Тойон кыыл» («Царь-птица») кыайыытын кэнниттэн регионнар киинэлэрэ Россия аатырбыт куонкурустарыгар куруук кыттар буолбуттара бэлиэтэнэр: 2019 сыллаахха Любовь Борисова «Мин үрдүбэр күн хаһан да киирбэт» («Надо мною солнце не садится») киинэтэ 41-с Москватааҕы норуоттар икки ардыларынааҕы киинэ бэстибээлин көрөөччү биһирэбилэ бирииһин ылбыта, Дмитрий Давыдов «Ийэкээм» («Нет Бога кроме меня») киинэтэ «Окно в Европу» бэстибээлгэ талыллан киирбитэ, оттон 2020 сыллаахха «Пугало» киинэтэ «Кинотавр» Гран-при бирииһин ылбыта, Степан Бурнашев «Хара хаар» («Черный снег») киинэтэ «Окно в Европу» национальнай киинэ бэстибээлин сүрүн бирииһин ылбыта.

«Сотору кэминэн регионнар киинэлэрэ бүтүн Россиятааҕы прокатка бэйэлэрин хаххаларын булуохтара. Билигин манна аҕыйах бырайыак тиийдэ: «Сайсары күөлгэ»(«Мой убийца») сахалыы триллер уонна “Водяная” татар остуоруйата. «Тойон кыыл» («Царь-птица») киинэ Россия икки киин куоратынан муҥурдаммакка, биһиги дойдубут хайдах курдук кинематографическай кыахтааҕын өйдүүргэ болҕомтону уурда», – диэн Алексей Беззубиков этэр.

«Тойон кыыл» суруйааччы В.В. Яковлев “Тэҥҥэ кырдьыбыт тэҥкэ тиит” кэпсээнигэр олоҕуран уһуллубут. 1930-с сыллардаахха бүтэй тайҕаҕа олорор Микииппэр уонна Оппуос олохторо көстөр. Күһүөрү балаҕаннарын аттыгар турар тэҥкэ тииттэрин хотой буулуоҕуттан, уу-нуурал олохторо айманар.