Томпо хайатын чыпчаалыгар биэс бырааттыы Малгиннар ааттарын иҥэрдилэр

Саха сирин быыһыыр сулууспатын үлэһиттэрэ Томпо улууһугар баар Оганьинскай хайа сиһин аата суох чыпчаалыгар ытыннылар. Хайаны дабайыы Улуу Кыайыы 75 сылыгар ананна. Бу туһунан биэдэмистибэ пресс-сулууспата иһитиннэрэр.

Ылыллыбыт чыпчаалга Аҕа дойду Улуу сэриитин толоонугар олохторун олук уурбут ини-бии Малгиннарга ананар стела туруорулунна, ону тэҥэ алгыс сиэрэ-туома ыытылынна.

Таатта улууһун Баайаҕа нэһилиэгин олохтооҕо Февронья Малгина биэс уола сэрииттэн төннүбэтэхтэрэ. II-c Алексей Малгин финскай сэриигэ баҕа өттүнэн баран, ылбыт бааһырыыларыттан өлбүтүн уонна Томскай куоракка көмүллүбүт. I-ы Алексей, Петр уонна Василий Малгиннар Аҕа дойду Улуу сэриитин кэмигэр сураҕа суох сүппүттэр. Спиридон Малгин блокадаламмыт Ленинград госпитальыгар ылбыт бааһырыыларыттан өлбүт.