Томпоҕо саҥа оҕо уһуйаана аһылынна

Олунньу 25 күнүгэр Томпо улууһун Ыҥаа нэһилиэгэр «Буратино» саҥа кыра кэмпилиэктээх оҕо уһуйаана аһылынна. Бу туһунан СӨ тутуу министиэристибэтин пресс-сулууспата иһитиннэрэр.

Оскуола иннинээҕи оҕо тэрилтэтэ 35 иитиллээччигэ учуоттанна.

«Уопсайа 443,39 квадратнай миэтэрэ иэннээх сиргэ биириттэн сэттэлэригэр диэри саастаах оҕолору үс бөлөҕүнэн үөрэтии тэриллиэҕэ», — диэн иһитиннэриигэ этиллэр.

Оҕо уһуйаана «Мин Сахам сирэ XXI үйэҕэ» өрөспүүбүлүкэтээҕи үтүө дьыала хамсааһына олоххо киириитин чэрчитинэн тутулунна. Бырагыраама 20-тэн тахса сыл устата олохтоох көҕүлээһиннэри өйүүр.