«Тотальнай дьыктааны» 150-тан тахса былаһааккаҕа суруйуохтара

Аан дойдутааҕы «Тотальнай дьыктаан-2021» аахсыйа өрөспүүбүлүкэ 150 былаһааккатыгар ыытыллыаҕа. Бу туһунан Хотугулуу Илиҥҥи федеральнай үнүбэрсиэт пресс-сулууспата иһитиннэрэр.

«Аахсыйа былаһааккаларынан өрөспүүбүлүкэ 33, Дьокуускай 15 оскуолата, 108 куорат уонна оройуон библиотекалара буолуохтара. Уопсайынан, куоракка 24 былаһаакка үлэлиэҕэ, ол иһигэр Хотугулуу- Илиҥҥи федеральнай үнүбэрсиэккэ — алта», — диэн иһитиннэриигэ этиллэр.

«Тотальный дьыктаан» муус устар 10 күнүгэр буолар, 2021 сыллаахха Россия куораттарыттан Дьокуускайга буолара быһаарыллыбыта. Аахсыйа сүрүн былаһааккатынан Өксөкүлээх Өлөксөй аатынан норуоттар доҕордоһууларын дьиэтэ буолуоҕа, онно тиэкис ааптара, Россия суруйааччыта Дмитрий Глуховскай, 14:00 чааска «Обещания» айымньытын быһа эпииргэ ааҕыаҕа.

«Якутия 24» ханаал «Тотальнай дьыктаан-2021» аахсыйаны быһа көрдөрүөҕэ. Араас локациялартан быһа эпиир 13:30 чаастан саҕаланыаҕа уонна олохтоох бириэмэнэн 17:00 чааска диэри буолуоҕа.

Ону сэргэ аахсыйа сайтыгар онлайн трансляция кэмигэр дьиэттэн суруйуохха сөп.