«Тотальнай дьыктааны» 500 киһи суруйда

Саха сирин национальнай библиотекатын былаһааккатыгар Zoom сервис нөҥүө 500 кэриҥэ киһи «Тотальнай дьыктаан» аахсыйаҕа кыттыыны ылла. Бу туһунан национальнай библиотека пресс-сулууспата иһитиннэрэр.

Хотугулуу-Илиҥҥи федеральнай үнүбэрсиэт тыл салаатын нуучча тылыгар үрдүкү преподователэ Анастасия Алексеева диктордаата. Текст ааптарынан суруйааччы Андрей Геласимов буолла.

Кыттыылаахтар үлэлэрин алтынньы 17-20 күннэригэр flftotal@mail.ru электроннай почтаҕа ыыталлара ирдэнэр. Техническэй биричиинэнэн дьыктааны сатаан суруйбатах олохтоохтор Саха сирин национальнай бибилиотекатын официальнай ютуб ханаалыгар видеоҕа устууну көрүөхтэрин сөп.

Бэрэбиэркэ түмүгүнэн дьыктаан кыттыылаахтарыгар сыыһаларын ахсаана ыйыллар сертификат бэриллиэҕэ.

«Тотальнай дьыктаан» бүгүн, алтынньы 17 күнүгэр Россия үрдүнэн ыытыллар.