«Цифровой дьыктаан-2021» аахсыйаҕа кэккэ уларыйыылар киирдилэр

2021 сылга бүтүн Россиятааҕы «Цифровой дьыктаан» аахсыйаҕа кэккэ уларыйыылар баар буолуохтара. Бу туһунан СӨ инновация министиэристибэтин пресс-сулууспата иһитиннэрэр.

«Олортон биирдэстэрэ — целевой аудиториялары бөлөхтөргө араарыы. 60-тан аҕа саастаах дьоҥҥо туспа дьыктаан баар буолуоҕа. Дьыктаан өссө интэриэһинэй уонна көдьүүстээх буоларын туһугар атын халыыптаах боппуруостар киллэриллиэхтэрэ. Тэрийээччилэр эдэр аудиторияны интэриэһиргэтэр сыалтан, боппуруостары ордук интерактивнай оҥордулар», — диэтэ ОНФ киин штабын кыттыгас бэрэссэдээтэлэ, «Россия — страна возможностей» түмсүү генеральнай дириэктэрэ Алексей Комиссаров.

Дьыктаан, компьютерга уонна да атын цифровой тээбириннэргэ үлэлиир сатабылы, сэрэхтээх буолуу быраабылаларын уонна интернет ситимигэр кэпсэтии култууратын, маны таһынан, интэрниэти билиини бэрэбиэркэлииргэ көмөлөһүөҕэ. Манна 7-13, 14-17 саастаах оҕолор уонна улахан дьон кыттыахтарын сөп.

«Цифровой дьыктаан-2021» түөрт бөлөхтөн турар. Бастакы бөлөх цифровой туһаныы уонна компьютеры билии олуктарыгар ананыаҕа, иккис — цифровой компетенцияларга, үһүс — цифровой куттала суох буолууга, төрдүс — саҥа технологияларга. Дьыктааны суруйан баран кыттааччы «Сыыһаларга үлэ» салааҕа киирэн ханнык хайысхаҕа сатабылын уонна билиитин хаҥатыан сөбүн билиэҕэ.

РАЭК, ОНФ уонна Microsoft тэрийбит, сыл аайы ыытыллар «Цифровой Дьыктаан-2021» бүтүн Россиятааҕы аахсыйата муус устар 9-24 күннэригэр цифровойдиктант.рф сайтка онлайн көрүҥүнэн ыытыллыаҕа.

Бырайыак сайтыгар «Хочу все знать» диэн цифровой билии матырыйаалларынан библиотека үлэлиир, онлайн уонна офлайн көрүҥнэргэ нэһилиэнньэ цифровой билиитин үрдэтэр бырагыраамалардаах, куурустардаах «Карта цифровых возможностей» тиһигин быспакка саҥардыллар.