Цифровой технология уруоктара Россия үрдүнэн ыытыллыахтара

Балаҕан ыйын 14 күнүттэн 27 күнүгэр диэри «Искусственный интеллект и машинное обучение» диэн уруогу «Урок цифры» үөрэхтээһин бырайыага ыытыаҕа.

Уруок сыала — искуустубаннай өй (ИӨ) үлэтин тутулун уонна принциптэрин оҕолорго тиэрдии, ону тэҥэ бу эйгэҕэ үлэ туһунан билиһиннэрии. 1-тан 11-с кылаас үөрэнээччилэрэ төрөппүт, эбэтэр учуутал көмөтүнэн дистанционнай ньыманан үөрэниэхтэрин сөп.

ИӨ уруога видео-лиэксийэттэн уонна онлайн дьарыктан турар. Лиэксийэттэн үөрэнээччилэр искуустубаннай өй хайдах үөскүүрүн билиэхтэрэ. Оонньуу көрүҥнээх дьарыкка DataScience эйгэ түһүмэхтэрин ааһыахха уонна ыытар киһитэ суох массыынаҕа алгоритм толкуйдуохха сөп.

«ИӨ билиҥҥи туругунан, араас эйгэни сайыннарар технология буолар. Сотору кэминэн кини күннээҕи олоххо, уопсастыбаҕа туһуланар судаарыстыба үлэтэ тупсарыгар, урбаан эйгэтэ сайдарыгар көмөлөһүөҕэ. Онон программист идэтэ сайдар, сыллата хамнаһа үрдүүр», — диэтэ РФ Цифровой сайдыытын миниистирэ Максут Шадаев.

«Урок цифры» — диэн үөрэнээччилэргэ бастыҥ технологическай хампаанньалартан билии ылар уонна цифровой экономика сатабылларын сайыннарар бүтүн арассыыйатааҕы үөрэхтээһин бырайыага. Алын, орто, үрдүкү сүһүөх оҕолорго аналлаах, араас тиэмэлэргэ онлайн-оонньуу быһыытынан дьарыктардаах.