Тулагы оскуолатын «өйдөөх» теплицатыгар оҕуруот аһа силигилии үүнэр

Төһө даҕаны киин улуустарга, Дьокуускайга хаһыҥнаатар, Тулагы оскуолатын теплицата үүнээйинэн силигилиир. Манна оҕолор оҕурсуттан саҕалаан араас оҕуруот аһын олордоллор.

Улахан иһит кыраанын эрийиэх эрэ кэрэх, уу быыкаа хаапыланан таммалаан, үүнээйи силиһин угуттуур. Ону хонтуруоллаан, хара буор аһара сиигирээри гыннаҕына, тохтотон биэрэллэр.

Илии үлэтин биллэ аҕыйаппыт «өйдөөх» теплица — бу Тулагы оҕолорун тобуллаҕас толкуйдара. Ону кумааҕыга түһэрэн киллэрбиттэрин, Дьокуускай дьаһалтата сэргээн, 1 мөлүйүөннээх грант ылан, торумнарын толорбуттар.

400-тэн тахса кв миэтэрэ иэннээх теплицаҕа оҕуруот аһын үс миэстэнэн арааран олордубуттар. Бастакыга — помидор аҕыс суорда, иккискэ — оҕурсу, салгыы баклажан, пиэрэс баар.

Өлгөм үүнүү буоруттан быһаччы тутулуктаах, онуоха үөһэ-аллара эриллэн, Калифорния чиэрбэлэрин туһата баһаам эбит. Тулагы оҕолоро билигин 2 мөлүйүөн чиэрбэни харахтарын далыгар туталлар.

Саҕалааһын диэтэххэ, үүнүү балачча. 2,5 тонна оҕуруот аһын хомуйан, оҕурсуну киилэтин 50 солкуобайга, помидору 100 солкуобайга атыылаабыттар.

Билигин кыһыҥҥы хаһааска уураллар, ол быыһыгар кырдьаҕастары, кыамматтары умнубаттар.

«Оҕолор үөрэ-көтө үлэлииллэр. Ол иһин оҕуруоппут үүнүүтэ өлгөм», — диир Тулагы агро хайысхалаах оскуолатын производственнай үөрэхтээһин маастара Венера Тарабукина.

Тулагы оҕолоро теплицаларын таһырдьа уонча кыраадыс тымныйыар диэри көрөр-истэр баҕалаахтар. Эһиил саас, кулун тутар ыйтан, араскы тартаран, табылыннаҕына, дьылы эргиччи күөҕүнэн чэлгитиэхтэрэ.