Тверьгэ снайпер Федор Охлопков кэриэһигэр мас тардыһыы турнира ыытыллыаҕа

Муус устар 9-11 күннэригэр Тверь куоракка саха снайпера, Сэбиэскэй Сойуус дьоруойа Федор Охлопков сырдык кэриэһигэр бүтүн Россиятааҕы мас тардыһыы күрэхтэһиитэ буолуоҕа. Бу туһунан СӨ спорт министиэристибэтин пресс-сулууспата иһитиннэрэр.

Турнир кыттыылаахтарынан биллиилээх спортсменнар, Россия чемпионнара уонна норуоттар икки ардыларынааҕы күрэхтэһиилэр кыайыылаахтара, ону тэҥэ, Федор Охлопков төрөөбүт дойдутуттан, Томпоттон, сүүмэрдэммит хамаанда буолуохтара.

Кыайыылаахтар 2021 сыллааҕы мас тардыһыыга Россия чемпионатыгар кыттар быраабы ылыахтара диэн бэлиэтииллэр.

Санатан эттэххэ, Саха сирин көҕүлээһининэн, 2020 сыллаахха Тверь уобалаһын Ржевскай оройуонугар Федор Охлопков аатынан байыаннай-патриотическай лааҕыр аһыллыбыта, бу базаҕа көрдүүр этэрээттэр дислокацияланыахтара уонна бүтүн Россия үрдүнэн ыччаты үөрэтэр-чинчийэр үлэҕэ үөрэтии ыытыллыаҕа.