Тыа хаһаайыстыбатын бородууксуйатын оҥорон таһаарааччылары 2020 сылтан субсидиялыахтаахтар

2020 сылга эксперимент ыытан, фермердэри өйүүр суолу тобулуохтара. Бу туһунан Ил Дархан Айсен Николаев «Быһа линия» кэмигэр иһитиннэрдэ.

Ол курдук тыа хаһаайыстыбатын бородууксуйатын оҥорон таһаарааччылары туттарбыт үүттэриттэн эбэтэр сүөһүлэрин төбөлөрүн ахсааныттан көрөн субсидия биэрэр туһунан боппуруос турар.

«Эһиил кэккэ улуустарга эксперимент ыытыахпыт диэн эрэнэбин. Онон үтүө түмүктэри ылан, хайдах быһыылаахтык үбүлүүрү быһаарыахпыт», — диэтэ Айсен Николаев.

Бу иннинэ Айсен Николаев өрөспүүбүлүкэ бырабыыталыстыбатыгар 100 буолбакка, 25 уонна онтон элбэх төбө сүөһүлээх хаһаайыстыбаларга көмө оҥорорго сорук биэрбитэ.

«Бу курдук хаһаайыстыбалар үбүнэн көмө бырагырааматыгар киириэхтээхтэр», — диэн Ил Дархан бэлиэтээтэ.