«Тыгын Дархан» киинэ сэтинньигэ киэн экраҥҥа тахсыаҕа

Василий Семенович Яковлев-Далан «Тыгын Дархан» арамаанынан уһуллубут уус-уран киинэ 2020 сыл сэтинньитигэр киэҥ экраҥҥа тахсыаҕа. Бу туһунан СӨ баһылыгын уонна бырабыыталыстыбатын дьаһалтатытн пресс-сулууспата иһитиннэрэр.

Балаҕан ыйын 25 күнүгэр Юрий Гагарин аатынан култуура уонна аныгы искуустуба киинигэр устар бөлөх уонна киинэ ууһуллубут улуустарын бэрэстэбиитэллэрэ кыттыылаах режиссер Никита Аржаков киинэтин премьера иннинээҕи көрдөрүүтэ ааста.

«Саха өрөспүүбүлүкэтин күнүн көрсө киинэ оҥорооччулартан дьиҥнээх бэлэҕи туттубут. Режиссер Никита Аржаков «Тыгын Дархан» киинэтэ оҥоһуллан бүттэ уонна киэҥ экраҥҥа тахсарга бэлэм. Маннык киинэлэр — саха киинэтэ сыллата сайда турарын туоһулуур бастыҥ дакаастабыл буолаллар. Киинэ киэн экраҥҥа таҕыстаҕына, Саха сиригэр саҥа сулустар умайыахтара», – диэн Ил Дархан Айсен Николаев эттэ.

Киинэни устуу 2016 сылга саҕаламмыта. Бырайыак сырдатар, тыаһы устар, монтажтыыр оборудованиеларын атыылаһарга өрөспүүбүлүкэ бүддьүөтүттэн үп- харчы көрүллүбүтэ. Үлэ икки сыл устата өрөспүүбүлүкэ тоҕус улууһугар ыытылынна.

Киинэҕэ көстөр хартыыналары оҥорорго XVI үйэтээҕи уонча ураһа, мал-сал, сүүһүнэн сэрии сэбэ-сэбиргэлэ, национальнай көстүүмнэр оҥоһуллубуттара.

«Тыгын Дархан» киинэни чахчы норуот киинэтэ диэххэ сөп — киинэ уһуллуутугар Саха сирин уон тыһыынча кэриҥэ олохтооҕо кыттыыны ылла. Уһулуу үлэтин былаһын тухары биир дойдулаахтарбыт өйөөтүлэр», – диэн киинэ режиссера Никита Аржаков кэпсээтэ.