«Тыгын Дархан» киинэни Хабаровскайга көрдөрүөхтэрэ

Ахсынньы 16-17 күннэригэр Хабаровскай куоракка «Тыгын Дархан» киинэни көрдөрүөхтэрэ. Бу туһунан Саха сирин Уһук Илиҥҥэ бэрэстэбиитэлистибэтин пресс-сулууспата иһитиннэрэр.

Никита Аржаков режиссердаах Василий Яковлев-Далан арамааныгар олоҕурбут «Тыгын Дархан» киинэ «Совкино» киинэ тыйаатырыгар сахалыы тылынан нууччалыы субтитрдаах көстүөҕэ.

Историческай драма сүрэхтэниитэ 2020 сыл сэтинньитигэр ааспыта.

Киинэни устуу 2016 сылга саҕаламмыта. Бырайыак сырдатар, тыаһы устар, монтажтыыр оборудованиеларын атыылаһарга өрөспүүбүлүкэ бүддьүөтүттэн үп-харчы көрүллүбүтэ. Үлэ икки сыл устата өрөспүүбүлүкэ тоҕус улууһугар ыытылынна. Киинэҕэ көстөр хартыыналары оҥорорго XVI үйэтээҕи уонча ураһа, мал-сал, сүүһүнэн сэрии сэбэ-сэбиргэлэ, үс тыһыынча кэриҥэ национальнай көстүүмнэр оҥоһуллубуттара.

Инники этиллибитинэн, «Тыгын Дархан» киинэ Ногородка ыытыллар бүтүн Россиятааҕы киинэ бэстибээлин арыйыаҕа.