«Тымныыны баһылааччылар» экспедиция Өймөкөөҥҥө тиийдэ

Айаннарын үһүс күнүгэр «Тымныыны баһылааччылар» экпедиция Өймөкөөҥҥө баар базаҕа тиийдэ. Иккис хамаанда Дьааҥыга салгыы сарсын, тохсунньу 15 күнүгэр айанныыр.

«Бэҕэһээ мууһунан айаннаан истэхпитинэ, массыынабыт батыллыбыта. Ону хостуу сырыттахпытына, кыратык кытыытын алдьаппыппыт. Бүгүн оҥоһуннубут уонна сарсын салгыы айанныахпыт», –  диэтэ бырайыак ааптара уонна салайааччыта Вячеслав Ипатьев.

Өймөкөөн хамаандата сарсын температураны кэтээн саҕалыаҕа уонна эфиргэ тахсыаҕа диэн иһитиннэрдэ.

Санатан эттэххэ, бырайыак кытааччылара икки нэдиэлэ устата Дьааҥы уонна Өймөкөөн улуустарыгар муҥутуур намыһах температуралаах сирдэри көрдөөн, бэйэлэрин тымныынан тургутан көрүөхтэрэ.