Уһук Илиҥҥэ тэриллэр авиа хампаанньа SSJ-100 сөмөлүөттэринэн хааччыллыаҕа

Уһук Илиҥҥэ тэриллэр авиа хампаанньа 20-чэ SSJ-100 сөмөлүөттэринэн хааччыллыаҕа. Бу туһунан Россия бырамыысыланнаска уонна атыыга-эргиэҥҥэ миниистирэ Денис Мантуров иһитиннэриитин ТАСС тириэрдэр.

«Россия Уһук Илини уонна Арктиканы сайыннарыыга уонна тырааныспарга министиэристибэлэрин кытта сөбүлэһии түмүгүнэн, барыллаан быһыытынан 20-чэ сөмөлүөт көрүллүөҕэ», — диэн Денис Мантуров эттэ.

Билиҥҥи туругунан саҥа авиа хампаанньа «Якутия» эбэтэр «Авроры» хампаанньалар баазаларыгар тэриллэрин туһунан боппуруос быһаарыллар.

Россия бэрэсидьиэнэ Владимир Путин 2019 сыл ахсынньы 11 күнүгэр дойду бырабыыталыстыбатын кытта мунньах түмүгүнэн, Уһук Илиҥҥэ сөмөлүөтүнэн сырыыны хааччыйыыга саҥа авиа хампаанньа тэрийэр туһунан этиилэри киллэрэллэригэр соруйбута.