Илиҥҥи форум түмүгүнэн Саха сирэ уопсайа 40 миллиард солкуобай суумаҕа 45 сөбүлэһиини баттаста

НВК САХА – Саха сирин Ил Дархана Айсен Николаев өрөспүүбүлүкэ Илиҥҥи форумҥа кыттыытын түмүгүн сөбүлээбитин биллэрдэ.

Форум чэрчитинэн өрөспүүбүлүкэ уопсайа 40 миллиард солкуобайтан тахса суумаҕа 45 сөбүлэһиини түһэристэ. Бары бырайыактар чахчы олоххо киирэр кыахтаахтар диэн эрэлин биллэрэр.

«РусГидро», «РосАтом» уонна «АЛРОСА» хампаанньалары кытары баттаммыт сөбүлэһиилэр Саха сиригэр олох хаачыстыбатын сайыннарыыга олус суолталаахтарын бэлиэтээтэ.

«Тас дойду хампаанньаларын кытары эмиэ хас да сөбүлэһии түһэристибит. Улахан аҥара Япония хампаанньаларын кытары баттаспыт дуогабардарбыт буолаллар. Манна бэлиэтээн эттэххэ, Саха сирэ Японияны кытары икки өттүнэн барыстаах үлэлээһиҥҥэ инники күөҥҥэ сылдьар», – диэн этэр.

Кини тириэрдэринэн, Япония премьер-миниистирэ  Синдзо Абэ Саха сирин кытары бииргэ үлэлээһини үчүгэй холобур быһыытынан бэлиэтээбит.

«Бу сырыыга Тикси куоракка тыалынан барар дизельнай установка туруоруутун туһунан кэпсэтии барда. Былырыын Япония хампаанньата тыалынан үлэлиир үс генераторы туруорбута. Олор -43 кыраадыстаах тымныыга сөкүүндэҕэ 30 миэтэрэ күүстээх тыалга кыһыны туораатылар. Билигин дизельнай установкалар хайыы үйэ Россияҕа кэлбиттэр. Бастаан бэлэмнээһин үлэтэ ыытыллыа уонна саҥаттан хааччыйыы кэнниттэн, эһиил Тиксигэ диэри илдьии үлэтэ барыа. VI Уһук Илиҥҥи форум саҕаланарыгар Тикси тыалынан барар дизельнай установкалара хайыы үйэ үлэҕэ киирэн турар буолуохтара диэн эрэнэбит», – диир Ил Дархан.

Бу установкалар Тикси куората уончанан тыһыынча оттугу харыстыырыгар кыах биэриэ. Маннык установкалар кэлин Өрөспүүбүлүкэ атын сирдэригэр эмиэ баар буолуохтарын сөп.

Ону тэҥэ, форум чэрчитинэн Ил Дархан Япония экономикаҕа миниистирин кытары көрүстэ.

Саха сирин кытары үлэлииргэ интэриэстэрин өссө Кытай уонна Корея биллэрдилэр.

Судаарыстыбаннай Сэбиэт президиумун кэмигэр Айсен Николаев  Уһук Илини сайыннарыы национальнай бырагырааматын көрдөрбүтэ. Ол түмүгэ эмиэ үөрдэр диэн этэр.

«Көнөтүк эттэххэ, былааннаабыт сорукпутунааҕар элбэҕи ыллыбыт. Россия бэрэсидьиэнэ биһиги этиибитин сарсыҥҥы күнүгэр хайыы үйэ өйөөтө уонна сэтинньи ый ортотугар диэри бигэргэтии үлэтин түмүктүүр туһунан сорук туруорда. Бырагыраама толору ылыллыаҕа диэн эрэнэбин», – диэн Ил Дархан санаатын үллэстэр.

Уһук Илини сайыннарыы бырагырааматын олохтооһуҥҥа нэһилиэнньэттэн 16,5 тыһыынча кэриҥэ этии киирбит, улахан аҥара Саха сириттэн диэн бэлиэтэнэр.