«Уһук Илиҥҥи гектардаах» дьон сирдэрин приватизациялыахтарын сөп

«Уһук Илиҥҥи гектардаах» дьон сирдэригэр дьиэ туттарга, Россия баанын кытта ипотекаҕа дуогабар түһэрсибит буоллахтарына, сирдэрин эрдэттэн бэйэлэрин ааттарыгар суруйтарыахтарын сөп.

Бу сокуону, ахсынньы 2 күнүгэр, Федерация Сүбэтэ өйөөтө.

«Бу сир учаастагар чааһынай дьиэ туттарыгар целевой кирэдьиит көрүллүбүт буоллаҕына, биэс сылы кэтэспэккэ, сир учаастага гражданиҥҥа бэриллиэн сөп», — диэн Федерация Сүбэтин сайтыгар бэлиэтэнэр.

Бу сокуон ыллылла илигинэ, учаастак биэс сылга босхо бэриллэрэ, онтон бэйэ аатыгар суруйтарарга дуогабар бүтэрэ сыл аҥара хаалбытын кэннэ, олорор дьиэ учаастакка тутулла илик буоллаҕына, оҥоһуллара.

Бу иннинэ бэйэ бас билбэт учаастагын солуок быһыытынан ылбат буолуулара «Уһук Илиҥҥи гектары» ылыыга ыарахаттары үөскэтэрэ.

««Уһук Илиҥҥи гектары» бас билээччи ипотека кирэдьиитин ылар кыаҕа суох. Онтон олоҕурбут нуорманан этиллэринэн, учаастакка дьиэ тутуллубут буоллаҕына учаастак бэйэ аатыгар суруллар. Маннык балаһыанньа «Уһук Илиҥҥи гектарынан» туһаныыны бытаардар уонна бырагырааманы сайыннарбат этэ», — диэн СӨ бырабыыталыстыбатын уонна баһылыгын дьаһалтатын пресс-сулууспатын иһитиннэриитигэр этиллэр.