Уһук Илин уонна Арктика үс тыһыынча кэриҥэ урбаанньыта «Развивай.рф» бырайыакка кытынна

Кыра уонна орто урбааны өйүүр «Развивай.рф» бырагыраамаҕа үс тыһыынча Уһук Илин уонна Арктика урбаанньыттара кытыннылар. Бу туһунан портал пресс-сулууспата иһитиннэрэр.

Кыра уонна орто урбааны өйүүр бырайыак Уһук Илин сайдыытын пуондатын, ВЭБ.РФ уонна Mail.ru Group нөҥүө олоххо киирэр.

«Бырайыак сүрүн сыала — Уһук Илин, Арктика кыра уонна орто урбаанын, интернет ситимигэр боростуойдук уонна түргэнник сайыннарарга көмө. Хас биирдии кыттааччы «Вконтакте» ситимҥэ босхо интернет-маҕаһыын аһыан уонна социальнай ситимҥэ урбаанын хамсатарга 53 тыһыынча солкуобайга диэри ылыан сөп», — диэн иһитиннэриигэ этиллэр.

Онлайн.развивай.рф порталга урбаанньыттарга аналлаах бизнеһи цифровизациялааһын, интернет нөҥүө атыылааһын ньымаларын туһунан үөрэтэр роликтары, ону тэҥэ судаарыстыбаннай өйөбүл миэрэлэрин туһунан иһитиннэриилэри туһаныахха сөп.