Уһук Илини сайыннарыы бырагыраамата бигэргэннэ

Россия бырабыыталыстыбата Уһук Илиҥҥи регион социальнай-экономическай сайдыытын национальнай бырагыраамата бигэргэттэ. Бу туһунан ТАСС иһитиннэрэр.

Уһук Илини уонна Арктиканы сайыннарыы миниистирэ Александр Козлов бэлиэтииринэн, бырагыраама бигэргэниитэ Уһук Илиҥҥи регионнарга ураты суолталаах түгэн буолар. Россияҕа аан бастакытын биир туспа ылыллыбыт уокуругу кэлэр сылларга сайыннарыы хайысхаларын быһаарар стратегическай докумуонун оҥоһулунна.

«Бырагыраамаҕа Уһук Илиҥҥи уокурук нэһилиэнньэтин олоҕун хаачыстыбатын тупсарыыга уонна экономическай сайдыы тэтимин түргэтэтиигэ туһаайыллар уончанан тыһыынча тэрээһиннэр киирдилэр», — диэн Александр Козлов бэлиэтээтэ.

Национальнай бырагырааманы Уһук Илини уонна Арктиканы сайыннарыы министиэристибэтэ 2019 сыл устата оҥордо.

Балаҕан ыйыгар Илиҥҥи экономическэй форум кэмигэр бырагырааманы Россия бэрэсидьиэнэ Владимир Путинҥа көрдөрдүлэр. Дойду баһылыга докумуону биһирээтэ уонна үбүлээһин источниктарын чуолкайдыырга сорудахтаата.

Национальнай бырагыраама 2024 сылга диэри болдьоххо оҥоһулунна, итиэннэ кэскилгэ 2035 сылга диэри.