Учуонайдар 1,2 мөл. саастаах үс былыргы мамоннар геномнарын сөргүттүлэр

Россия уонна омук сирин учуонайдара 600 тыһыынча — 1,2 мөлүйүөн саастаах үс былыргы мамоннар геномнарын сөпргүттүлэр. Бу туһунан ТАСС иһитиннэрэр.

Учуонайдар түмүктэрэ Nature сурунаалга таҕыста.

«Кыыллар өлүктэрин саастарыттан сылыктаатахха, икки Сибиир мамонын төрүттэрэ баара сабаҕаланар, үһүс — Сиргэ саамай былыргы бэрэстэбиитэл. Барыларын 1970 сыллаахха Россия палеонтолога Андрей Шер булбута», — диэтэ Стокгольмнааҕы үнүбэрсиэт профессора Лав Дален.

Профессор Дален уонна кини бииргэ үлэлиир дьоно, Дания учуонайдарын аҕыс сыллаҕы рекордарын куоһарбыттара бэлиэтэнэр. Кинилэр нэһилиэнньэлэр ааттарынан Адыча, Чукоча уонна Крестовка диэн ааттаах үс мамонт өлүгүн чинчийбиттэрэ.

«Үс мамоннар ДНК саптара күүскэ эмсэҕэлээбиттэр, онон уонунан сыллар усталарыгар мөлүйүөнүнэн быстыбыт молекулалары аахтыбыт, геномнарын сөргүттүбүт. Бу дьиҥнээх научнай дьикти буолла», — диэн Дален бэлиэтээтэ.