«Умнас» кыһыҥҥы айан суолунан сырыы кылгас кэмнэ хааччахтанна

Өлүөнэ өрүскэ тарыҥ тахсыбытынан сибээстээн Хаҥалас улууһугар «Умнас» кыһыҥҥы айан суолунан сырыы кылгас кэмнэ тохтоото. Бу туһунан Хаҥалас улууһун дьаһалтатын пресс-сулууспата иһитиннэрэр.

«Кулун тутар 19 күнүгэр киэһэ Өлүөнэ өрүскэ уу тахсан тарыҥ үөскээн, массыыналар сырыыларыгар кыһалҕалары үөскэттэ», — диэн этиллэр.

Суолу чөлүгэр түһэрии үлэлэрэ бүгүн, кулун тутар 20 күнүгэр саҕаланаллара бэлиэтэнэр.

«Хаҥалас улууһун биир кэлим диспетчерскэй сулууспата чөлүгэр түһэрии үлэтэ түмүктэниэр диэри, айанньыттары «Умнас» айан суолунан сырыыттан туттуналларыгар ыҥырар», — диэн пресс-сулууспата тириэрдэр.