Усуйаанаҕа сэттэ саастаах оҕо тас таҥаһа суох таһырдьа тахсан барбыт

Усуйаана улууһугар полиция үлэһиттэрэ утуйар таҥаһынан таһырдьа тахсан барбыт сэттэ саастаах оҕону буллулар. Бу туһунан Россия ис дьыалаҕа министиэристибэтин Саха сиринээҕи салаатын пресс-сулууспата иһитиннэрэр.

Тохсунньу 9 күнүгэр олохтоох бириэмэнэн киэһэ 18.45 чааска Депутатскай олохтооҕуттан оҕото сүппүтүн туһунан иһитиннэрии киирбит. Дьахтар тириэрдибитинэн, үлэтиттэн кэлбитэ сэттэ саастаах кыыс оҕото дьиэтигэр суоҕа, ол эрээри таһырдьа кэтэр тас таҥаһа дьиэҕэ хаалбыта биллибит.

Оҕону көрдөөһүҥҥэ полиция салаатын бары үлэһиттэрэ ыҥырыллыннылар. Үлэһиттэр дьиэ кэргэн олорор «Арктика» микрооройуонун бары дьиэлэрин кэрийэн саҕалаабыттар.

«Салаа оперативнай дьуһуурунайа кыыс оҕону ыаллыы турар дьиэлэртэн биирдэстэрин подъеһыттан булбут. Оҕо утуйар таҥастаах уонна атаҕар унтуулаах эбит. Булалларыгар кыыс хайыы үйэ тоҥон тирэстии сылдьыбыт. Полиция үлэһитэ ытаабыт оҕону бэйэтин сонугар суулаан төрөппүттэригэр тиксэрбит», — диэн этиллэр.

Оҕону быраастар көрбүттэр. Доруобуйата улахан улаханнык эмсэҕэлээбэтэҕэ, кыра уопсай тымныйыы ылбыта бэлиэтэммит.