Уу суудуналарын идэлэрэ бастакытын WorldSkills Russia киирдилэр

WorldSkills Russia-2021 IX-с аһаҕас региональнай чемпионат иитинэн Саха сиригэр аан бастакытын «Уу тырааныспарын суудуналарын туһаныы» хайысханан күрэхтэстилэр. Бу туһунан СӨ тырааныспарга министиэристибэтин пресс-сулууспата иһитиннэрэр.

«Бу хайысха биһиэхэ саҥа буолар, ону тэҥэ биһиги бу компетенция көрдөрүллүбүт Россия бэһис регионунан буоллубут. Манна олох-дьаһах куттала суох буолуута, суудуналары салайыы, техническэй эксплуатация уонна ыарахан таһаҕаһы суудунаҕа тиэйии үлэтин дьиссипилиинэлэрэ киирэллэр», — диэн сүрүн эксперт Александр Шипицын бэлиэтээтэ.

Кэнэҕэскитин техник-судоводитель уонна техник-судомеханик буолуохтаах ыччат Жатайдааҕы техникум баазатыгар күрэхтэстэ. Бастакы күн кыттааччылар суудуналары өрүскэ уонна муораҕа ыытыы үөрүйэхтэрин көрдөрдүлэр. Иккис күн техническэй туһаныы киирдэ. Үһүс күн олох-дьаһах куттала суох буолуутун уонна ыарахан таһаҕаһы суудунаҕа тиэйии хайысхаларынан билиилэрин тургуттулар.

Саха сирэ WorldSkills Russia хамсааһыҥҥа Россия уон бастакы регионун кэккэтигэр кыттыспыта. WorldSkills халыыптарын орто үөрэх кыһаларын систиэмэтигэр киллэрии 2013 сыллаахтан саҕаламмыта.