Уус Алдан оскуолатын интэрнээтигэр 25 киһи коронавирустаата

Уус Алдан улууһун Лөгөй орто оскуолатын интэрнээтин 22 иитиллээччитэ уонна үс үлэһитэ коронавирустаата. Бу туһунан СӨ үөрэххэ уонна наукаҕа министиэристибэтин пресс-сулууспата иһитиннэрэр.

Уус Алдан улуустааҕы дьаһалтатын үөрэҕириигэ управлениетын салайааччыта Ирина Тарская бэлиэтииринэн, ыалдьыбыт дьон бары туруктара этэҥҥэ. Үөрэнээччилэр Лөгөй учаскуобай балыыһатын обсерваторыгар эмтэниини ааһаллар.

Кэптэни сэлиэнньэтигэр алтынньы 10 күнүгэр диэри карантин биллэрдилэр. Инфекция күүскэ тарҕаныытын сэрэтэр сыалтан эбии дьаһаллар ылылыннылар.

«Балаҕан ыйын 15 күнүттэн улуус оскуолалара очнай быһыылаах үөрэхтээһини саҕалаабыттара. Лөгөй орто оскуолатын үөрэнээччилэрэ интэрнээккэ олохсуйбуттара, ол кэннэ балаҕан ыйын 18 күнүгэр үс оҕоҕо ыарыы сибикитэ биллибитэ. Тута ылыллыбыт анализтар COVID-19 инфекциятын бигэргэппиттэрэ. Салгыы коронавирус өссө 19 үөрэнээччигэ уонна үс үлэһиккэ көстүбүтэ. Сабаҕалааһын быһыытынан, вирус тарҕаныыта атын улуустан кэлбит оҕоттон саҕаламмыт», – диэн Ирина Тарская эттэ.

Сэттэ оҕоҕо коронавирус сибикитэ баара биллэр, атыттар ыарыыны чэпчэкитик аһардаллар. Үс үлэһит дьиэттэн эмтэниини ааһаллар.

Хаалбыт 24 иитиллээччи салгыы интэрнээккэ олорор. Оскуола толору дистанционнай быһыылаах үөрэтиигэ көстө. Роспотребнадзор улуустааҕы салаата тахсыбыт быһылаанынан бэрэбиэркэ ыытар.